मेळघाटातील आदिवासी गावांचा कायापालट होणार! ‘धरतीआबा’ अभियानातून घरकुल, रस्ते आणि वीज प्रश्नावर भर; खासदार बळवंत वानखडे यांचे प्रशासनाला आदेश

अमरावती, ०५ मार्च २०२६ | मॅक्स मंथन डेली न्यूज:

अमरावती : “चिखलदरा आणि धारणी या आदिवासीबहुल तालुक्यांच्या सर्वांगीण विकासासाठी ‘धरतीआबा जनजातीय ग्राम उत्कर्ष अभियान’ अत्यंत महत्त्वाचे आहे. या अभियानांतर्गत शासकीय योजनांचा लाभ थेट शेवटच्या घटकापर्यंत पोहोचायला हवा. विशेषतः मेळघाटातील घरकुल, रस्ते आणि प्रलंबित वीज प्रश्नांवर प्रशासनाने युद्धपातळीवर काम करावे,” असे निर्देश खासदार बळवंत वानखडे यांनी दिले.

अमरावती जिल्हाधिकारी कार्यालयात आयोजित धरतीआबा अभियानाच्या आढावा बैठकीत ते बोलत होते. यावेळी मुख्य कार्यकारी अधिकारी संजिता महापात्र, धारणीचे उपविभागीय अधिकारी सिद्धार्थ शुक्ला आणि विविध विभागांचे प्रमुख उपस्थित होते.

खासदार वानखडे यांनी बैठकीत प्रामुख्याने खालील विषयांवर भर दिला:

• घरकुल योजना: अभियानातील ३०४ गावांमधील घरकुलासाठी पात्र असलेल्या नागरिकांची तातडीने यादी तयार करून त्यांना हक्काचे घर मिळवून द्यावे.

• रस्ते विकास: वनक्षेत्रातील तांत्रिक अडचणींमुळे नवीन रस्ते करणे कठीण असले तरी, ग्राम सडक योजनेतून अस्तित्वातील रस्त्यांचा दर्जा सुधारून दळणवळण सोपे करावे.

• पाणीपुरवठा: मेळघाटातील ग्रामीण भागात पिण्याच्या पाण्याचा प्रश्न गंभीर असल्याने पाणीपुरवठ्याच्या योजना प्रभावीपणे राबवाव्यात.

मेळघाटातील २२ गावांमध्ये अद्याप विजेचा प्रश्न कायम आहे. यातील ३ गावांत सौर ऊर्जा यंत्रणा बसवली असली तरी ती देखभाल-दुरुस्तीअभावी बंद आहे. ही यंत्रणा तातडीने कार्यान्वित करण्याचे आदेश खासदारांनी दिले. तसेच, आरोग्य सुविधेसाठी ‘आयुष्मान कार्ड’ वाटपाला गती देण्यासाठी अतिरिक्त मोबाईल व्हॅन तैनात करण्याच्या सूचनाही त्यांनी दिल्या.

दुर्गम भागातील नागरिकांना आरोग्य सेवा देताना रुग्णालयांमध्ये मुबलक औषध पुरवठा ठेवण्याचे निर्देश देण्यात आले आहेत. यासोबतच कौशल्य विकास, पशुधन आणि बालकांसाठीचा पोषण आहार या विषयांचाही सविस्तर आढावा या बैठकीत घेण्यात आला. मेळघाटातील आदिवासी बांधवांच्या प्रगतीसाठी हे अभियान एक महत्त्वपूर्ण पाऊल ठरेल, असा विश्वास प्रशासनाने व्यक्त केला आहे.

© २०२६ मॅक्स मंथन डेली न्यूज. सर्व हक्क राखीव।