पुणे-नगर रोडवर धावणार दुहेरी विकास! ६ पदरी उड्डाणपूल आणि मेट्रोसाठी संयुक्त पाहणी सुरू; वाघोलीपर्यंतच्या प्रवासाचा मार्ग होणार मोकळा
पिंपरी चिंचवड प्रतिनिधी बालाजी नवले, ०६ मार्च २०२६ | मॅक्स मंथन डेली न्यूज:
पिंपरी/पुणे : पुणे शहराच्या वाहतूक कोंडीत अत्यंत महत्त्वाच्या असलेल्या नगर रोडवरील रामवाडी ते वाघोली या टप्प्यात आता ६ पदरी उन्नत रस्ता (Elevated Road) आणि मेट्रो मार्गिकेच्या कामाला वेग आला आहे. या प्रकल्पाच्या नियोजनासाठी पुणे महानगरपालिका (PMC) आणि महामेट्रोच्या वतीने आज, ६ मार्चपासून प्रत्यक्ष जागेवर संयुक्त पाहणी (Joint Inspection) सुरू करण्यात आली आहे.
सुमारे ४.७ किलोमीटर लांबीचा हा प्रकल्प नगर रोडवरील वाहतुकीचा चेहरामोहरा बदलणारा ठरणार आहे. विशेष म्हणजे, शहराच्या इतिहासात पहिल्यांदाच ४ किमी पेक्षा जास्त लांबीचा ६ पदरी उन्नत रस्ता एकाच वेळी बांधला जाणार आहे.
महामेट्रोने तयार केलेल्या सविस्तर प्रकल्प अहवालानुसार (DPR), या विस्तारित मार्गावर चार प्रमुख मेट्रो स्थानके प्रस्तावित आहेत:
१. विमाननगर
२. सोमनाथनगर
३. खराडी बायपास
४. तुळजाभवानी
आजपासून सुरू झालेल्या पाहणीमध्ये या स्थानकांची नेमकी जागा, प्रवाशांच्या प्रवेश आणि बाहेर जाण्याचे मार्ग (Entry-Exit Points) तसेच मेट्रो मार्गिकेचे अलाईनमेंट यांची तांत्रिक पडताळणी केली जाणार आहे.
नगर रोडवर नेहमीच असणारी वाहतूक कोंडी पाहता, बांधकामाच्या काळात नागरिकांचे हाल होऊ नयेत, यासाठी स्थानिक रहिवाशांनी चिंता व्यक्त केली आहे. “बांधकाम सुरू करण्यापूर्वी प्रशासनाने वाहतूक व्यवस्थापनाचा (Traffic Management) ठोस आराखडा तयार करावा,” अशी मागणी नागरिकांकडून होत आहे. महामेट्रोने या कामासाठी एजन्सी नियुक्त करण्यासाठी निविदा प्रक्रिया (Tendering) आधीच सुरू केली आहे.
महानगरपालिकेने खराडी बायपास आणि इतर दोन ठिकाणी या ६ पदरी उन्नत रस्त्यावर चढण्यासाठी आणि उतरण्यासाठी रॅम्पची (Ramps) सोय करण्याचे प्रस्तावित केले आहे. तसेच, मेट्रो स्थानकांजवळ पादचाऱ्यांसाठी आणि वाहनांच्या हालचालींसाठी पुरेशी जागा सोडण्याच्या सूचनाही देण्यात आल्या आहेत.
नगर रोडप्रमाणेच हडपसरमध्येही भैरोबा नाला चौक पुढे उन्नत रस्ता आणि मेट्रो मार्गिकेचे नियोजन आहे. या मार्गासाठीही पुढील काही दिवसांत महामेट्रो आणि महापालिकेकडून संयुक्त पाहणी केली जाणार आहे. हडपसर येथील मेट्रो मार्ग थेट लोणी काळभोरपर्यंत प्रस्तावित आहे.
© २०२६ मॅक्स मंथन डेली न्यूज. सर्व हक्क राखीव।
