मल्याळम ‘मलवाझी’ ठरला सर्वोत्कृष्ट चित्रपट, तर ‘अ स्टोरी कार्वेड ऑन अ ट्री’ने लघुपटात मारली बाजी! आंतरराष्ट्रीय चित्रपट महोत्सवाचा पिंपरीत दिमाखदार समारोप

पिंपरी चिंचवड प्रतिनिधी बालाजी नवले, ०७ मार्च २०२६ | मॅक्स मंथन डेली न्यूज:

पिंपरी : जागतिक सिनेमाचा कुंभमेळा ठरलेल्या ‘पिंपरी चिंचवड आंतरराष्ट्रीय चित्रपट महोत्सवाचा’ (PCIFF 2026) पुरस्कार वितरण सोहळा आकुर्डी येथील ग. दि. माडगूळकर नाट्यगृहात अत्यंत दिमाखात संपन्न झाला. या महोत्सवात केरळमधील मल्याळम भाषेतील आशयसंपन्न ‘मलवाझी’ या चित्रपटाने ‘सर्वोत्कृष्ट चित्रपटाचा’ किताब पटकावला. तर मराठीतील ‘अ स्टोरी कार्वेड ऑन अ ट्री’ या लघुपटाने प्रेक्षक आणि परीक्षकांची मने जिंकत सर्वोत्कृष्ट लघुपट पुरस्कारावर आपले नाव कोरले.

पिंपरी चिंचवड महापालिका, फिल्म सोसायटी आणि सांस्कृतिक कार्य विभाग, महाराष्ट्र शासन यांच्या संयुक्त विद्यमाने आयोजित या महोत्सवात ४३ देशांमधील ११६ हून अधिक कलाकृतींचे प्रदर्शन करण्यात आले.

महोत्सवात वैयक्तिक श्रेणीतही चुरस पाहायला मिळाली. दुलाल रॉय आणि प्रणव जोशी यांना सर्वोत्कृष्ट अभिनेत्याचा, तर मिथिला हिरेमठ हिला सर्वोत्कृष्ट अभिनेत्रीचा पुरस्कार प्रदान करण्यात आला. आंतरराष्ट्रीय स्तरावर नावाजलेल्या ‘साबर बोंडं’ चित्रपटाचे दिग्दर्शक रोहन कानवडे यांना ‘पीसीआयएफएफ युवा प्रेरणादायी सिने आयकॉन पुरस्कार २०२६’ देऊन सन्मानित करण्यात आले.

पुरस्कार वितरणावेळी उपमहापौर शर्मिला बाबर म्हणाल्या की, “पिंपरी चिंचवडमधील सांस्कृतिक चळवळीला चालना देण्यासाठी आणि नवीन कलाकारांना व्यासपीठ उपलब्ध करून देण्यासाठी हा महोत्सव मैलाचा दगड ठरला आहे.” तर उपायुक्त पंकज पाटील यांनी हा महोत्सव शहराच्या सांस्कृतिक वैभवात भर घालणारा असल्याचे नमूद केले. महोत्सवाचा समारोप “क्रांतिज्योती विद्यालय – मराठी माध्यम” या वास्तववादी चित्रपटाने झाला, ज्याला रसिकांनी उभी राहून दाद दिली.

विजेत्यांची नामावली (प्रमुख विभाग):

या सोहळ्यास क्रीडा व सांस्कृतिक समिती सभापती कैलास कुटे, चित्रपट निर्माते नितीन वैद्य, अभिनेते श्रीकांत यादव, इनाम उल हक, रोहन कानवडे, आणि दत्ता गुंड यांसह अनेक मान्यवर उपस्थित होते. सूत्रसंचालन चैतन्य कुलकर्णी यांनी केले.

© २०२६ मॅक्स मंथन डेली न्यूज. सर्व हक्क राखीव।