सांगवी पोलिसांची कौतुकास्पद कामगिरी! हरवलेले १३० मोबाईल शोधून मूळ मालकांना केले परत; ‘CEIR’ पोर्टलचा प्रभावी वापर
पिंपरी चिंचवड प्रतिनिधी बालाजी नवले, ०८ मार्च २०२६ | मॅक्स मंथन डेली न्यूज:
सांगवी : आपले हरवलेले मौल्यवान मोबाईल पुन्हा मिळतील की नाही, या विवंचनेत असलेल्या १३० नागरिकांच्या चेहऱ्यावर आज सांगवी पोलिसांनी हास्य फुलवले आहे. पिंपरी-चिंचवड पोलीस आयुक्तालयाच्या हद्दीतील सांगवी पोलीस ठाण्याने ‘सी.ई.आय.आर.’ (CEIR) पोर्टलचा प्रभावी वापर करून शोधलेले १३० मोबाईल आज, ७ मार्च रोजी एका विशेष कार्यक्रमात त्यांच्या मूळ मालकांना सुपूर्द केले.
सांगवी पोलीस ठाण्याच्या हद्दीतून विविध कारणांनी गहाळ (Missing) झालेल्या मोबाईलचा शोध घेण्यासाठी वरिष्ठ पोलीस अधिकाऱ्यांच्या मार्गदर्शनाखाली विशेष मोहीम राबवण्यात आली होती. केंद्र सरकारच्या ‘सेंट्रल इक्विपमेंट आयडेंटिटी रजिस्टर’ (CEIR) या पोर्टलच्या तांत्रिक मदतीने या मोबाईलचे आयएमईआय (IMEI) क्रमांक ट्रेस करून त्यांचा माग काढण्यात पोलिसांना यश आले.
आज झालेल्या कार्यक्रमात सहाय्यक पोलीस आयुक्त (सांगवी विभाग) सचिन हिरे यांच्या हस्ते हे मोबाईल मालकांना देण्यात आले. यावेळी पोलीस उप-आयुक्त संदीप आटोळे यांनी आपले मत व्यक्त करताना सांगितले की, “मोबाईल परत मिळताना नागरिकांच्या चेहऱ्यावर दिसणारा आनंद आणि त्यांनी व्यक्त केलेले आभार हेच आम्हाला अधिक चांगले काम करण्यासाठी प्रेरित करतात.”
ही यशस्वी कामगिरी पोलीस आयुक्त विनयकुमार चौबे, सह-पोलीस आयुक्त डॉ. शशांक महावरकर, अपर पोलीस आयुक्त बसरवराज तेली यांच्या मार्गदर्शनाखाली करण्यात आली. यामध्ये सांगवी पोलीस ठाण्याचे वरिष्ठ पोलीस निरीक्षक जितेंद्र कोळी, पोलीस निरीक्षक (गुन्हे) अमोल नांदेडकर आणि पोलीस अंमलदार राजकुमार माने (ब.नं. ३३१४) यांनी महत्त्वपूर्ण भूमिका बजावली.
आपला हरवलेला मोबाईल पुन्हा हातात आल्याने अनेक कष्टकरी आणि विद्यार्थ्यांनी पोलिसांच्या कार्यतत्परतेबद्दल कृतज्ञता व्यक्त केली आहे.
© २०२६ मॅक्स मंथन डेली न्यूज. सर्व हक्क राखीव।
