पिंपरी-चिंचवडच्या कला-क्रीडा क्षेत्रासाठी ‘मास्टर प्लॅन’! खेळाडूंना विमा कवच आणि आंतरराष्ट्रीय क्रिकेट स्टेडियमसाठी समितीचा पुढाकार

पिंपरी चिंचवड प्रतिनिधी: बालाजी नवले, १३ मार्च २०२६ | मॅक्स मंथन डेली न्यूज:

पिंपरी : पिंपरी-चिंचवड शहरातील क्रीडा, कला आणि सांस्कृतिक वारसा अधिक समृद्ध करण्यासाठी महापालिकेच्या संबंधित समितीने आता कंबर कसली आहे. “समितीचे कामकाज केवळ तात्पुरत्या कार्यक्रमांपुरते मर्यादित न ठेवता, वर्षभराचे नियोजनबद्ध ‘सर्वसमावेशक धोरण’ तयार केले जाईल,” अशी महत्त्वपूर्ण घोषणा सभापती कैलास कुटे यांनी केली.

महानगरपालिकेच्या मुख्य प्रशासकीय इमारतीतील मधुकरराव पवळे सभागृहात पार पडलेल्या या बैठकीत शहराच्या सांस्कृतिक आणि क्रीडा विकासासाठी अनेक ऐतिहासिक निर्णय घेण्यात आले.

शहरातील खेळाडूंना येणाऱ्या अडचणी लक्षात घेऊन समितीने काही महत्त्वाचे प्रस्ताव मांडले आहेत:

• आंतरराष्ट्रीय क्रिकेट स्टेडियम: पिंपरी-चिंचवडमध्ये आंतरराष्ट्रीय दर्जाचे क्रिकेट स्टेडियम उभारण्यासाठी प्रयत्न करण्याचा निर्धार व्यक्त करण्यात आला.

• खेळाडू विमा योजना: खेळताना होणाऱ्या दुखापती आणि त्यावरील महागडा उपचार विचारात घेऊन खेळाडूंसाठी विशेष ‘विमा योजना’ सुरू करण्यावर चर्चा झाली.

• खेळाडू वसतीगृह: बाहेरून येणाऱ्या खेळाडूंच्या निवासासाठी शहरात स्वतंत्र वसतीगृह उभारले जाणार आहे.

• प्रशिक्षकांची भरती: दर्जेदार प्रशिक्षणाची सोय करण्यासाठी प्रशिक्षकांची संख्या वाढवण्याचे निर्देश देण्यात आले आहेत.

• स्थानिक कलाकारांची छायाचित्रे: महापालिकेच्या नाट्यगृहांमध्ये आता बाहेरील कलाकारांऐवजी शहरातील स्थानिक दिग्गज कलावंतांची छायाचित्रे लावली जाणार आहेत.

• कामगार दिन सोहळा: १ मे रोजी कामगार दिनानिमित्त शहरात विविध क्रीडा व सांस्कृतिक कार्यक्रमांचे आयोजन करून कामगारांचा सन्मान केला जाईल.

• क्लोरीनची पातळी: सर्व जलतरण तलावांमधील पाण्याची गुणवत्ता राखण्यासाठी क्लोरीनची पातळी नियमित तपासण्याचे आणि त्याचे फलक नागरिकांच्या माहितीसाठी दर्शनी भागात लावण्याचे आदेश देण्यात आले.

• मैदाने खुली करा: सुट्टीच्या दिवशी महापालिका शाळांची मैदाने मुलांसाठी खेळायला खुली ठेवण्याबाबत सकारात्मक निर्णय घेण्याच्या सूचना केल्या.

• खाजगीकरण: यमुनानगर आणि मोहननगर येथील जलतरण तलाव ३ वर्षांसाठी भाडेतत्त्वावर देण्याच्या ठरावाला मंजुरी देण्यात आली.

या बैठकीला विरोधी पक्षनेते भाऊसाहेब भोईर, सदस्य जितेंद्र ननावरे, शाम जगताप, तानाजी बारणे, धर्मपाल तंतरपाळे, उदय गायकवाड, योगेश लांडगे, प्रमोद कुटे, उपायुक्त पंकज पाटील, चेतना केरूरे आणि जनसंपर्क अधिकारी प्रफुल्ल पुराणिक उपस्थित होते.

© २०२६ मॅक्स मंथन डेली न्यूज. सर्व हक्क राखीव।