स्वच्छ पिंपरी चिंचवडसाठी नागरिकांनी पुढाकार घ्यावा; महापौर रवि लांडगे यांचे आवाहन
पिंपरी चिंचवड प्रतिनिधी लक्ष्मण प्रधान , ११ मे २०२६ मॅक्स मंथन डेली न्यूज:
पिंपरी: “पिंपरी चिंचवड शहर स्वच्छतेत देशात अव्वल स्थानावर नेण्यासाठी प्रत्येक नागरिकाने सक्रिय सहभाग नोंदवावा. स्वच्छ सर्वेक्षण २०२५–२६ अंतर्गत नागरिकांचा अभिप्राय हा शहराच्या विकासाचा आणि गुणवत्तेचा महत्त्वाचा आधार आहे,” असे आवाहन महापौर रवि लांडगे यांनी केले आहे.
शहरातील स्वच्छता व्यवस्था अधिक प्रभावी, पारदर्शक आणि नागरिकाभिमुख करण्यासाठी लोकसहभाग आवश्यक असल्याचे सांगत महापौरांनी स्वतःचा अभिप्राय नोंदवून नागरिकांसमोर आदर्श ठेवला आहे.
महापौर रवि लांडगे म्हणाले की, प्रशासनाच्या प्रयत्नांना लोकशक्तीची जोड मिळणे आवश्यक आहे. प्रत्येकाने आपला अभिप्राय नोंदवणे ही आपली सामूहिक जबाबदारी आहे. या मोहिमेत जास्तीत जास्त नागरिकांनी सहभागी व्हावे, यासाठी उपमहापौर शर्मिला बाबर आणि आयुक्त डॉ. विजय सूर्यवंशी यांनीही विशेष आवाहन केले आहे.
नागरिकांना अत्यंत सोप्या पद्धतीने आपला फीडबॅक देता येणार आहे. त्यासाठी संकेतस्थळ: https://cf.sbmurban.org या लिंकवर जाऊन नागरिक आपले मत नोंदवू शकतात.
आयुक्त डॉ. विजय सूर्यवंशी यांनी नमूद केले की, “नागरिकांचा अभिप्राय हा शहराच्या प्रगतीचा आरसा आहे. तुमच्या मतांमुळे शहरातील नागरी सेवा अधिक सक्षम बनवता येतील. त्यामुळे शहराच्या विकासात आपले योगदान नक्की द्यावे.”
पिंपरी चिंचवडला देशातील सर्वात स्वच्छ शहर बनवण्यासाठी सर्वांनी एकत्रित प्रयत्न करावेत, असे आवाहन यावेळी महापालिका प्रशासनाकडून करण्यात आले आहे.
© २०२६ मॅक्स मंथन डेली न्यूज. सर्व हक्क राखीव.
