नीट (NEET) पेपर लीकप्रकरणी मंत्रालयावर धडकणाऱ्या विद्यार्थ्यांवर मुंबई पोलिसांचा अमानुष लाठीचार्ज! पुण्यात शांतता, मुंबईत दडपशाही; सरकारचा दुटप्पी कारभार उघड
मुंबई/पिंपरी चिंचवड प्रतिनिधी लक्ष्मण प्रधान, १३ जून २०२६ मॅक्स मंथन डेली न्यूज:
मुंबई: देशपातळीवरील लाखो वैद्यकीय विद्यार्थ्यांच्या भविष्याशी खेळणाऱ्या ‘नीट’ (NEET) परीक्षा पेपर लीक घोटाळ्यावरून आज देशाची आर्थिक राजधानी मुंबईत प्रचंड रणकंदन पाहायला मिळाले. वंचित बहुजन आघाडीची अधिकृत विद्यार्थी संघटना असलेल्या ‘सम्यक विद्यार्थी आंदोलन’ आणि ‘वंचित बहुजन युवा आघाडी’च्या वतीने आज मुंबईतील मंत्रालयावर काढण्यात आलेल्या अत्यंत शांततापूर्ण ‘विद्यार्थी आक्रोश मोर्चा’वर पोलिसांनी अमानुष आणि निर्दयीपणे लाठीचार्ज केला आहे.
शिक्षणमंत्री धर्मेंद्र प्रधान यांच्या तात्काळ राजीनाम्याची मागणी करत शांततेने घोषणाबाजी करणाऱ्या शेकडो निष्पाप विद्यार्थ्यांना पोलिसांनी बेदम मारहाण केली आणि त्यांना बळजबरीने गाडीत कोंबून पोलीस ठाण्यात नेले. या कारवाईमुळे सरकार आणि पोलिसांच्या दडपशाही व हुकूमशाही कारभारावर प्रचंड संताप व्यक्त केला जात आहे.
या संपूर्ण अमानुष कारवाईनंतर आता पोलिसांच्या आणि सरकारच्या राजकीय दुटप्पीपणावर आणि पक्षपाती भूमिकेवर गंभीर प्रश्नचिन्ह उपस्थित केले जात आहे. कालच (१२ जून २०२६) पुण्यात याच अत्यंत संवेदनशील विषयावर आणि पेपर लीकच्या विरोधात हजारो विद्यार्थ्यांचे विराट आंदोलन पार पडले होते. पुणे पोलिसांनी त्या आंदोलनाला कोणत्याही प्रकारे अडवले नाही किंवा तिथल्या आंदोलक विद्यार्थ्यांना साधा स्पर्शही केला नाही.
परंतु, आज जेव्हा मुंबईत ‘सम्यक विद्यार्थी आंदोलन’ आणि ‘वंचित बहुजन युवा आघाडी’च्या वतीने लोकशाहीच्या मार्गाने आणि अत्यंत शांततापूर्ण पद्धतीने मंत्रालयासमोर याच ज्वलंत प्रश्नावर आवाज उठवला जात होता, तेव्हा मात्र पोलिसांनी थेट लाठीचार्ज करून क्रूरतेचा कळस गाठला. “पुण्यात वारी आणि मुंबईत दडपशाही? हा उघड राजकीय भेदभाव आणि दुटप्पी कारभार नेमका कशासाठी?” असा संतप्त सवाल आता विद्यार्थ्यांसह सुजाण नागरिक विचारत आहेत.
नीट परीक्षेतील प्रचंड घोटाळ्यामुळे विद्यार्थ्यांच्या मनात पालकांविषयी आणि स्वतःच्या भविष्याविषयी अथांग संताप आणि वैफल्य आहे. याच संतापाला वाट करून देण्यासाठी आज विद्यार्थी रस्त्यावर उतरले होते. मात्र, सरकारने विद्यार्थ्यांचे म्हणणे ऐकण्याऐवजी थेट पोलिसांच्या लाठ्या पुढे केल्या.
मिळालेल्या माहितीनुसार, पोलिसांनी पुरुष आणि महिला आंदोलक विद्यार्थ्यांना अत्यंत अमानुषपणे खेचले, त्यांना रस्त्यावर पाडून मारहाण केली. अनेक विद्यार्थ्यांना गंभीर दुखापती झाल्या आहेत. आंदोलकांना गुन्हेगारांसारखे फरफटत नेऊन पोलीस वाहनांमध्ये (व्हॅन) कोंबण्यात आले आणि विविध पोलीस ठाण्यांमध्ये डांबून ठेवण्यात आले. या दडपशाहीच्या कारवाईचा वंचित बहुजन आघाडी आणि विविध पुरोगामी विद्यार्थी संघटनांनी अत्यंत तीव्र शब्दांत निषेध नोंदवला आहे.
या पोलिसी अत्याचाराचा जाहीर निषेध करताना सम्यक विद्यार्थी आंदोलनाच्या प्रमुख नेत्यांनी सांगितले की, “सरकारच्या आणि पोलिसांच्या या अत्यंत लाजीरवाण्या दडपशाहीचा आम्ही अत्यंत तीव्र शब्दांत आणि जाहीर निषेध व्यक्त करतो. ही लोकशाहीची हत्या आहे. विद्यार्थ्यांनी स्वतःच्या हक्कासाठी आणि न्यायासाठी आवाज उठवणे हा गुन्हा आहे का? सरकारने कितीही लाठ्या चालवल्या किंवा आम्हांला तुरुंगात डांबले, तरीही आमची ही लढाई कमजोर होणार नाही. जोपर्यंत या संपूर्ण महाघोटाळ्याला कारणीभूत असलेले देशाचे केंद्रीय शिक्षणमंत्री धर्मेंद्र प्रधान आपल्या पदाचा अधिकृत राजीनामा देत नाहीत, तोपर्यंत विद्यार्थ्यांसाठीचा आणि देशाच्या शिक्षण व्यवस्थेच्या शुद्धीकरणासाठीचा आमचा हा लढा अधिक तीव्रतेने असाच अखंडपणे सुरूच राहील!”
© २०२६ मॅक्स मंथन डेली न्यूज. सर्व हक्क राखीव.
