भारताचा ‘स्पीड’ धमाका! IFSC आशियाई किड्स चॅम्पियनशिप २०२५ स्पर्धेचा रोमहर्षक समारोप

कोरियाचे १८ पदकांसह वर्चस्व; भारताला ७ पदके, ज्यात पुणे/महाराष्ट्रातील खेळाडूंचा सहभाग; ‘पिंपळे सौदागर’ येथील कॉम्प्लेक्स जागतिक स्तरावर चर्चेत

पिंपरी प्रतिनिधी शाम सोनवणे, दि. ६ नोव्हेंबर २०२५, मॅक्स मंथन डेली न्यूज:

पिंपरी-चिंचवड शहरात आयोजित करण्यात आलेल्या ‘आयएफएससी एशियन किड्स चॅम्पियनशिप २०२५’ (IFSC Asian Kids Championship 2025) या आंतरराष्ट्रीय स्पोर्ट क्लाइंबिंग स्पर्धेचा नुकताच शानदार समारोप झाला. पिंपरी चिंचवड महानगरपालिका (PCMC), महाराष्ट्र स्पोर्ट क्लाइंबिंग असोसिएशन (MSCA) आणि इंडियन माउंटनिअरिंग फाउंडेशन (IMF) यांच्या संयुक्त विद्यमाने ही स्पर्धा आयोजित करण्यात आली होती.

या स्पर्धेत दक्षिण कोरियाने सर्वाधिक १८ पदकांची कमाई करत आपले वर्चस्व सिद्ध केले. तर भारतीय खेळाडूंनी तब्बल ७ पदके जिंकत चमकदार कामगिरी केली आणि देशाचा झेंडा उंचावला.

आशियातील १३ देशांतील १६० हून अधिक युवा खेळाडूंनी (अंडर १३ आणि अंडर १५ गट) लीड, बोल्डर आणि स्पीड या तीन प्रकारांमध्ये उत्कृष्ट प्रदर्शन केले.

• भारताची ताकद: भारतीय खेळाडूंनी स्पीड प्रकारात चमकदार प्रदर्शन केले. विशेषतः, अंडर १३ मुलांच्या आणि मुलींच्या विभागात सर्व पदकांवर भारताने आपले वर्चस्व दाखवले.
• कोरियाचे वर्चस्व: कोरियाने लीड आणि बोल्डर प्रकारात सर्वाधिक पदके मिळवली.
• राज्यांचे योगदान: महाराष्ट्र व झारखंडमधील खेळाडूंनी विशेष कामगिरी करत भारताच्या युवा गिर्यारोहण क्षमतेचा परिचय दिला.

समारोप प्रसंगी बोलताना महाराष्ट्र स्पोर्ट क्लाइंबिंग असोसिएशनचे अध्यक्ष सुरेंद्र शेळके यांनी पिंपरी-चिंचवडच्या कॉम्प्लेक्सचे महत्त्व सांगितले.

💬 “पिंपरी चिंचवडमध्ये उभारलेला क्लाइंबिंग कॉम्प्लेक्स हा देशातील अत्याधुनिक प्रशिक्षण केंद्रांपैकी एक आहे. या केंद्रामुळे महाराष्ट्रातून आंतरराष्ट्रीय दर्जाचे खेळाडू निर्माण होतील. स्पर्धेत भारताला सात पदके मिळाली, यात पुण्यातील मिळीचंही समावेश आहे, ही आमच्यासाठी अभिमानाची बाब आहे.”

आयएफएससीच्या पंच पॅनलचे प्रमुख श्रीकृष्ण कडूसकर यांनी या यशस्वी आयोजनाबद्दल समाधान व्यक्त केले.

💬 “आम्ही आशियाई स्पर्धेचे यशस्वी आयोजन करू शकलो, ही समाधानाची बाब आहे. ‘मिशन ऑलिंपिक २०३६’ च्या दिशेने हा एक निर्णायक टप्पा ठरेल. पिंपळे सौदागर येथील या जागतिक दर्जाच्या कॉम्प्लेक्समध्ये भविष्यात जागतिक स्पर्धा घेतल्या जाऊ शकतात, अशी भावना परदेशी खेळाडू आणि प्रशिक्षकांनी बोलून दाखवली, हे पुण्याच्या क्रीडा संस्कृतीसाठी अभिमानास्पद आहे.”

महापालिकेच्या क्रीडा विभागाचे उप आयुक्त पंकज पाटील यांनी स्थानिक खेळाडूंना प्रोत्साहन देण्याचा निर्धार व्यक्त केला. अतिरिक्त आयुक्त विजयकुमार खोराटे यांच्या मार्गदर्शनाखाली महापालिका जागतिक स्तरावरील मैदाने, साहित्य व वातावरण तयार करत आहे. पाटील म्हणाले, “या स्थानिक स्पर्धांतूनच भविष्यात हेच स्थानिक खेळाडू जागतिक स्तरावरील स्पर्धांमध्ये शहराचे नाव उज्ज्वल करतील.”

© २०२५ मॅक्स मंथन डेली न्यूज. सर्व हक्क राखीव.