नेतृत्वाला सहा महिने पूर्ण! भाजप शहर जिल्हाध्यक्ष शत्रुघ्न (बापू) काटेंकडून ‘सेवा आणि संघटन’ या चार सूत्रांवर १९४ उपक्रम यशस्वी

 विक्रमी ‘सिक्सर’! १८० दिवसांत १९४ कार्यक्रम; शत्रुघ्न (बापू) काटेंच्या सहामाही कामकाजाचा पिंपरी-चिंचवड भाजपमध्ये डंका!

अध्यक्षपदाची सूत्रे हाती घेताच ‘तिरंगा पदयात्रा’सह संघटनात्मक कार्याचा धडाका; ३०० हून अधिक कार्यकर्त्यांच्या मुलाखती घेऊन टीमची बांधणी. (© २०२५ मॅक्स मंथन डेली न्यूज. सर्व हक्क राखीव.)

पिंपरी प्रतिनिधी शाम सोनवणे:

पिंपरी-चिंचवड शहर जिल्हा भारतीय जनता पार्टीच्या अध्यक्षपदाची सूत्रे स्विकारल्यानंतर शहर जिल्हाध्यक्ष शत्रुघ्न (बापू) काटे यांनी अवघ्या सहा महिन्यांच्या कालावधीत पक्षाचे, प्रदेशाकडून आलेले आणि सार्वजनिक स्वरूपाचे मिळून तब्बल १९४ कार्यक्रम यशस्वीपणे पार पाडल्याचा विक्रम केला आहे.

दिनांक १६ मे रोजी आमदार व प्रदेश भाजपचे निरीक्षक सिद्धार्थ शिरोळे यांच्या हस्ते श्री. काटे यांना अध्यक्ष निवडीचे पत्र देण्यात आले होते. उद्या (१६ नोव्हेंबर) पक्षाचे जिल्हाध्यक्ष म्हणून त्यांनी सूत्रे हाती घेतल्याच्या घटनेला सहा महिने पूर्ण होत आहेत.

ज्येष्ठ नगरसेवक असलेल्या श्री. काटे यांनी शहराध्यक्ष पदाची सूत्रे स्विकारल्यानंतर त्यांचा पहिला सत्कार राष्ट्रीय स्वयंसेवक संघाच्या जिल्हा कार्यालयात भार्गव सदन येथे पार पडला. त्यानंतर स्वातंत्र्यवीर सावरकर सामाजिक संस्थेतर्फे दुसरा सत्कार झाल्यानंतर त्यांनी संघटनात्मक कामकाजात स्वतःला झोकून दिले. कार्यकर्त्यांचे संघटन, बांधणी, जनसेवा आणि पक्षनिष्ठा या चार सूत्रांवर काम करण्यास श्री. काटे यांनी प्रारंभ केला.

त्यांच्या नेतृत्वाखाली कार्यकारिणी निवडताना त्यांनी शहर पातळीवर काम करू इच्छिणाऱ्या तीनशेपेक्षा अधिक कार्यकर्त्यांच्या प्रत्यक्ष मुलाखती घेतल्या व त्यामधून आपल्या टीमची बांधणी केली. अशा प्रकारच्या या वैशिष्ट्यपूर्ण निवड प्रक्रियेची पक्ष पातळीवर राज्य स्तरावर नोंद घेण्यात आली.

मागील सहा महिन्यातील प्रमुख कामांमध्ये सर्वाधिक यशस्वी झालेला आणि संपूर्ण शहरभर पडसाद उमटलेला कार्यक्रम म्हणजे भारतीय सैन्य दलाला वंदन करण्यासाठी शहर भाजपने आयोजित केलेली तिरंगा पदयात्रा होय. भाजपचे मित्र पक्ष व त्यांचे कार्यकर्ते देखील यामध्ये सहभागी झाले होते.

याव्यतिरिक्त, पुण्यश्लोक अहिल्यादेवी होळकर यांच्या ३०० व्या जयंतीनिमित्त अहिल्यादेवी स्मारक स्वच्छता अभियान तसेच चौंडी येथे महिलांचा विशेष भेट दौरा हा कार्यक्रमही महत्त्वपूर्ण म्हणून नोंदला गेला.

या सहामाहीत यशस्वी झालेले इतर प्रमुख उपक्रम:

• आत्मनिर्भर भारत ते विकसित भारत कार्यशाळा

• पश्चिम महाराष्ट्र विभागातील सर्व नवनियुक्त मंडल अध्यक्षांची कार्यशाळा

• आणीबाणीतील लढवय्यांचा गौरव

• संकल्प सिद्धी ते चौपाल सभा

• पंतप्रधान मोदी यांच्या अकरा वर्षाच्या कारकीर्दी निमित्त विविध उपक्रमांचा धडाका

• समरसता रक्षाबंधन उपक्रमांतर्गत १ लाख ४५ हजार राख्या संकलन अभियान

• ऑपरेशन सिंदूर विजयोत्सव

• स्वातंत्र्यसैनिक स्मारक स्वच्छता अभियान

• राष्ट्रपिता ते राष्ट्रनेता उपक्रम

• पंतप्रधानांच्या वाढदिवसानिमित्त सेवा पंधरवडा अभियान

आत्मनिर्भर भारत अभियान आणि जीएसटी अभियान आदी पक्षीय कामकाज संघटनेच्या माध्यमातून त्यांनी यशस्वी करून दाखवले.

शहर विकास आराखड्याबाबत नागरिकांचे प्रश्न भाजपच्या चारही आमदारांशी समन्वय साधून विधानसभेच्या अधिवेशनात मांडण्यासाठी पुढाकार घेणे, पक्षाचे मेळावे, अधिवेशन, मंडल कामकाजाचे उपक्रम, याचबरोबर गणेशोत्सव, दहीहंडी, दसरा, दिवाळी या सार्वजनिक सण व उत्सवाच्या माध्यमातून भारतीय जनता पक्षाची प्रतिमा व प्रतिष्ठा उंचावण्यासाठी त्यांनी सक्रिय सहभाग घेतला. चोवीस तास कार्यकर्त्यांच्या संपर्कात राहून त्यांच्या प्रश्नांची सोडवणूक करणे, त्यांना वेळ देणे, यांसारख्या कामांमुळे सहामाही काळात त्यांनी घेतलेली झेप महत्त्वपूर्ण ठरली आहे.

© २०२५ मॅक्स मंथन डेली न्यूज. सर्व हक्क राखीव.