आळंदी शहर वाहतुकीसाठी ०१ डिसेंबर रोजी बंद; सार्वजनिक निवडणुकीच्या सभेमुळे ‘या’ मार्गांवर वाहनांना प्रवेश नाही
मरकळ, वळणगाव आणि देहूफाटाकडून येणाऱ्या सर्व प्रकारच्या वाहनांना मनाई; पोलीस उपायुक्त विवेक पाटील यांनी तात्पुरते आदेश केले जारी
पिंपरी प्रतिनिधी शाम सोनवणे, दि. ३० नोव्हेंबर २०२५, मॅक्स मंथन डेली न्यूज:
आळंदी नगरपरिषद सार्वत्रिक निवडणूक सन २०२५ च्या अनुषंगाने शहरात होणाऱ्या सभेमुळे वाहतुकीची कोंडी होण्याची शक्यता आहे. पिंपरी-चिंचवड शहर परिसरातून आळंदी शहरात प्रवेश करणाऱ्या वाहनांची वाहतूक सुरक्षित व सुरळीत राखण्यासाठी, दिनांक ०१ डिसेंबर २०२५ रोजी वाहतूक मार्गात तात्पुरते बदल करण्यात आले आहेत.
पोलीस उपायुक्त, वाहतूक शाखा, पिंपरी-चिंचवड शहर विवेक पाटील यांनी मोटार वाहन कायद्यातील कलमे ११५, ११६(१)(अ)(ब), ११६(४) आणि ११७ अन्वये प्राप्त झालेल्या अधिकारानुसार हे आदेश निर्गमित केले आहेत. हे निर्बंध सकाळी ०८:०० वाजेपासून ते रात्री २०:०० वाजेपर्यंत (८ वाजल्यापर्यंत) लागू असतील.
आळंदी शहरात येणाऱ्या सर्व प्रकारच्या वाहनांसाठी (अत्यावश्यक सेवा सुविधांची वाहने वगळूण) खालील मार्गांवर प्रवेशबंदी (नो एन्ट्री) लागू करण्यात आली आहे:
-
मरकळ गाव बाजूकडून येणारी वाहने: या वाहनांना पी.सी.एस. चौकमार्गे वळणगाव, घडनंद व चाकण, पुणे बाजूकडे जाण्यास मनाई करण्यात येत आहे.
-
वळणगाव, घडनंद बाजूकडून येणारी वाहने: वळणगाव रोडने आळंदी मार्गे पुणे व चाकण बाजूकडे जाण्यास मनाई करण्यात येत आहे.
-
देहूफाटा चौकाकडून आळंदीकडे येणारी वाहने: देहूफाटा चौक ते आळंदीकडे येणाऱ्या सर्व प्रकारच्या वाहनांना प्रवेशासाठी मनाई करण्यात येत आहे.
टीप: अत्यावश्यक सेवा सुविधांची वाहने (उदा. रुग्णवाहिका, पोलीस वाहने) तसेच सभेकरिता येणारी वाहने वगळता इतर सर्व प्रकारच्या वाहनांना आवश्यकतेनुसार प्रवेश बंदी करण्यात येत आहे.
पोलीस उपायुक्त विवेक पाटील यांनी वाहनचालकांना वरील आदेशाची अंमलबजावणी करून पर्यायी मार्गाचा अवलंब करण्याचे आवाहन केले आहे.
© २०२५ मॅक्स मंथन डेली न्यूज. सर्व हक्क राखीव.
