मोर्चा-चर्चा नको, कागद-कलमाच्या बळावर पिंपरी-चिंचवडला ‘रोल मॉडेल शहर’ बनवू – नामदेवराव जाधव

संविधान गौरव सप्ताह सांगता समारंभात प्रसिद्ध व्याख्याते नामदेवराव जाधव यांचे तरुणांना आवाहन; “भारत हे विविधतेला एकत्र आणणारे एकमेव राष्ट्र”

पिंपरी प्रतिनिधी शाम सोनवणे, दि. १ डिसेंबर २०२५, मॅक्स मंथन डेली न्यूज:

चिंचवडगाव येथे २६ नोव्हेंबर २०२५ ते ३० नोव्हेंबर २०२५ या कालावधीत आयोजित करण्यात आलेल्या ‘भारतीय संविधान गौरव सप्ताहाचा’ सांगता समारंभ प्रसिद्ध लेखक आणि प्रेरणादायी वक्ते मा. नामदेवराव जाधव यांच्या व्याख्यानाने आणि मा. इंजिनीअर देवेंद्र तायडे यांच्या अध्यक्षतेखाली नुकताच उत्साहात संपन्न झाला.

प्रा. नामदेवराव जाधव साहेब यांनी आपल्या व्याख्यानात भारताच्या संविधानाचे महत्व विषद केले. ते म्हणाले, “भारत हा संविधानाच्या मूल्यांवर सर्व जाती, धर्म, भाषा, प्रांत यांना एकत्र करणारा जगातील एकमेव देश आहे. जगात सर्वात मोठे संविधान आपल्या भारत देशाचे आहे.”

त्यांनी युवा वर्गाला विशेष आवाहन केले:

• “युवा वर्गाने मोर्चा, चर्चा किंवा जास्त खर्चा न करता ‘कागद व कलम’ यांच्या साह्याने बेरोजगारी, भ्रष्टाचार आटोक्यात आणून प्रथम आपले पिंपरी-चिंचवड हे जगामध्ये ‘रोल मॉडेल आदर्श शहर’ बनवून जगाच्या नकाशावर पुन्हा एकदा घेऊन जावे.”

• तरुणांनी सजग राहून कायद्याच्या साह्याने सर्व प्रश्न सोडवावेत.

• कोणीही व्यसन करू नये, सदृढ व प्रगत राष्ट्रासाठी एकत्र प्रयत्न करावे आणि जातीय भेद बाजूला ठेवावेत.

• त्यांनी आपल्या आजूबाजूला जास्तीत जास्त शाळा, महाविद्यालये, अभ्यासिका आणि उच्च तंत्रज्ञान असलेले दवाखाने उभे करण्याची सूचना केली.

• “कोठेही जाती-जातीमध्ये दरी उभी न करता आपण सर्व भारतवासी एक होऊन आदर्श देश निर्माण करू,” असे भावनिक आवाहन त्यांनी केले.

कार्यक्रमाचे अध्यक्ष मा. इंजिनीअर देवेंद्र तायडे साहेब यांनीही आपल्या भाषणात संविधान दिनाचे महत्त्व पटवून दिले आणि उपस्थित नागरिकांना आपला भारत देश कायमस्वरूपी एकसंघ राहील यासाठी एकत्र येण्याचे आवाहन केले.

या सप्ताहाची सांगता सर्वांच्या सहकार्याने उत्साहात पार पडली. कार्यक्रमाचे प्रास्ताविक प्रा. सारंग वाघमारे यांनी केले, तर सूत्रसंचालन ईश्वर इंगळे यांनी केले. तसेच, आयु. प्रबोध साळवी यांनी भारतीय संविधानाच्या उद्देशिकेचे वाचन केले.

कार्यक्रमाचे यशस्वी संयोजक:

या संविधान गौरव सप्ताहाचे आयोजन शाक्यमुनी बुद्ध विहार, भिमचेतना मित्र मंडळ, माता रमाई महिला मंडळ, भिमनगर, चिंचवडगाव, पुणे-३३ यांनी केले होते.

उपस्थित कार्यकर्ते:

यावेळी सुधीर जगताप, चंद्रकांत जगताप, अजित जगताप, राहुल शिरोळे, कैलास आल्हाट, सचिन पवार, अतुल जगताप, गौरव जगताप आदी मंडळाचे कार्यकर्ते उपस्थित होते. विकास जगताप यांनी उपस्थितांचे आभार मानले.

© २०२५ मॅक्स मंथन डेली न्यूज. सर्व हक्क राखीव.