भोसरी MIDC मध्ये ‘व्हेपर क्लाऊड एक्सप्लोजन’; अंबिका पावडर कोटिंग कंपनीत LPG स्फोटात ६ कामगार जखमी

अग्निशमन विभागाने तातडीने परिस्थिती आणली नियंत्रणात; अतिरिक्त आयुक्त विजयकुमार खरोटे यांची औद्योगिक सुरक्षेवर चिंता

पिंपरी चिंचवड प्रतिनिधी बालाजी नवले, दि. १ डिसेंबर २०२५, मॅक्स मंथन डेली न्यूज:

शहरातील भोसरी एमआयडीसी परिसरातील अंबिका पावडर कोटिंग कंपनीमध्ये शनिवार, २९ नोव्हेंबर २०२५ रोजी दुपारी पावणे चारच्या सुमारास एलपीजी (लिक्विफाइड पेट्रोलियम गॅस) चा अचानक स्फोट होऊन मोठी आग लागल्याची गंभीर घटना घडली. या घटनेची माहिती मिळताच पिंपरी-चिंचवड महापालिकेच्या अग्निशमन विभागाच्या पथकांनी तात्काळ घटनास्थळी धाव घेत परिस्थिती नियंत्रणात आणली.

या दुर्घटनेत एकूण ६ कामगार जखमी झाले असून, त्यात सुनील कुमार (गंभीर जखमी) या कामगारासह दाऊ कुमार, सुड्ड जयस्वाल, सुरज जाटो, राहुल कुमार आणि रोहित कुमार हे पाच कामगार किरकोळ जखमी झाले आहेत. सर्वांना प्रथमोपचारानंतर पुढील वैद्यकीय उपचाराकरिता रुग्णालयात रवाना करण्यात आले आहे. स्फोटाच्या मोठ्या आवाजाने तसेच आगीच्या उंच ज्वाला व धुरामुळे परिसरात भीतीचे वातावरण निर्माण झाले होते.

घटनेची माहिती मिळताच मुख्य अग्निशमन केंद्र पिंपरी, नेहरूनगर उप अग्निशमन केंद्र आणि भोसरी उप अग्निशमन केंद्र येथील पथके तात्काळ घटनास्थळी दाखल झाली. अग्निशमन विभागाच्या पथकाने तातडीने बचाव कार्य सुरू केले आणि उष्णता व धुरामुळे होणारा पुढील धोका लक्षात घेऊन कंपनीतील कामगारांना सुरक्षित बाहेर काढून आग नियंत्रणात आणली.

या कार्यवाहीमध्ये उप अग्निशमन अधिकारी गौतम इंगवले आणि दिलीप गायकवाड यांच्यासह तब्बल ३० अग्निशामक जवान सहभागी होते. अग्निशामक पथकांनी एकत्रित समन्वयाने बचाव व अग्निशमन कार्य सुरळीतपणे पार पाडले.

स्फोटाचे नेमके कारण अद्याप समोर आले नसले तरी, अग्निशमन विभागाचे अधिकारी ऋषिकांत चिपाडे यांनी प्राथमिक अंदाज व्यक्त केला आहे.

ऋषिकांत चिपाडे, अग्निशमन अधिकारी, पिंपरी-चिंचवड महापालिका:

“घटनास्थळी मोठ्या प्रमाणात आढळलेल्या एलपी गॅस सिलेंडरमधून एलपी ज्वलनशील गॅसची गळती मोठ्या प्रमाणात झाल्यामुळे ‘व्हेपर क्लाऊड एक्सप्लोजन’ (Vapour Cloud Explosion) घडले असल्याचा प्राथमिक अंदाज आहे. सदर परिसरात अधिक प्रमाणात एलपी गॅस सिलेंडर असल्याने कारखान्यातील धूर आणि उष्णतेमुळे बचावकार्य आव्हानात्मक होते, परंतु प्रत्येक कामगाराला सुरक्षित बाहेर काढणे आणि पुढील स्फोटाचे धोके टाळणे हेच आमच्या जवानांचे मुख्य ध्येय होते.”

या घटनेनंतर औद्योगिक क्षेत्रातील सुरक्षिततेवर महापालिकेच्या उच्च अधिकाऱ्यांनी चिंता व्यक्त केली आहे.

विजयकुमार खरोटे, अतिरिक्त आयुक्त, पिंपरी-चिंचवड महापालिका:

“औद्योगिक क्षेत्रातील कामकाजात सुरक्षा मानकांचे काटेकोर पालन न करणे ही अनेक दुर्घटनांची प्रमुख कारणे आहेत. नियमित तपासणी, उपकरणांची देखरेख आणि कामगारांना दिले जाणारे सुरक्षा प्रशिक्षण हे घटक दुर्लक्षित झाले, तर असे प्रकार पुन्हा घडू शकतात. त्यामुळे औद्योगिक सुरक्षेला प्राधान्य देणे महत्त्वाचे आहे.”

व्यंकटेश दुर्वास, उपायुक्त, पिंपरी-चिंचवड महापालिका:

“एलपीजी सारख्या उच्च धोक्याच्या साधनांशी संबंधित प्रत्येक प्रक्रियेत नियमित तपासणी, देखभाल आणि कामगारांना आवश्यक प्रशिक्षण देणे ही कंपन्यांची मूलभूत जबाबदारी आहे. या घटनेतून भविष्यातील धोक्यांबाबत अधिक जागरूक राहण्याची गरज स्पष्टपणे जाणवते.”

या स्फोटाचे नेमके कारण शोधण्यासाठी अग्निशमन विभाग आणि संबंधित अधिकाऱ्यांकडून पुढील तपास सुरू करण्यात आला आहे. दरम्यान, कोणत्याही आपत्कालीन परिस्थितीत १०१ या आपत्कालीन क्रमांकावर संपर्क साधण्याचे आवाहन अग्निशमन विभागाकडून करण्यात आले आहे.

© २०२५ मॅक्स मंथन डेली न्यूज. सर्व हक्क राखीव.