शेकडो दिव्यांग बांधवांनी घेतली ‘मतदान शपथ’; आगामी निवडणुकीत १००% मतदान करण्याचा दृढ निर्धार

जागतिक दिव्यांग दिनानिमित्त पिंपरी-चिंचवड महापालिकेचा ‘स्वीप’ उपक्रम; मतदानासाठी सर्व आवश्यक सुविधा पुरवण्याची ग्वाही

पिंपरी प्रतिनिधी शाम सोनवणे, दि. ४ डिसेंबर २०२५, मॅक्स मंथन डेली न्यूज: 

पिंपरी-चिंचवड महानगरपालिकेच्या वतीने जागतिक दिव्यांग दिनानिमित्त आयोजित कार्यक्रमात शेकडो दिव्यांग बांधवांनी एकत्र येत मतदानाची शपथ घेतली आणि आगामी महानगरपालिका निवडणुकीत १०० टक्के मतदान करण्याचा निर्धार केला. अतिरिक्त आयुक्त तथा ‘स्वीप’ व्यवस्थापन प्रमुख तृप्ती सांडभोर यांच्या उपस्थितीत हा महत्त्वाचा उपक्रम यशस्वीरीत्या पार पडला.

शपथेचे वाचन जनता संपर्क अधिकारी प्रफुल्ल पुराणिक यांनी केले. या शपथेमध्ये, मुक्त, निःपक्षपाती आणि शांततापूर्ण वातावरणात कोणत्याही प्रलोभनास बळी न पडता निर्भयपणे मतदान करण्याची प्रतिज्ञा करण्यात आली.

पिंपरी-चिंचवड महापालिकेच्या नियोजित सार्वत्रिक निवडणुकीच्या अनुषंगाने मतदानाबाबत जनजागृती करण्यासाठी आयुक्त श्रावण हर्डीकर यांच्या मार्गदर्शनाखाली आणि अतिरिक्त आयुक्त तृप्ती सांडभोर यांच्या अधिपत्याखाली ‘स्वीप’ उपक्रम राबविण्यात येत आहे. दिव्यांग मतदारांचा सहभाग वाढावा आणि त्यांना सक्षमपणे मतदान करता यावे, यासाठी महापालिकेकडून अनेक सुविधा उपलब्ध करून देण्यात येणार असल्याची माहिती यावेळी देण्यात आली:

• सुविधांची खात्री: दिव्यांग मतदारांना मतदान केंद्रावर आवश्यक असलेल्या सर्व सुविधा उपलब्ध असल्याची खात्री करणे.

• तंत्रज्ञान: ‘सक्षम ॲप’ (Saksham App) च्या अनुषंगाने संबंधित अधिकारी म्हणून कामकाज पाहणे.

• भौतिक सुविधा: मतदान केंद्रावर रॅम्प, व्हीलचेअर आणि इतर अनुषंगिक सोयी सुविधा पुरविणे.

• सहाय्यता: मतदान केंद्रावर दिव्यांग मतदारांना मतदानासाठी तसेच स्वच्छतागृह येथे ने आण करण्याकरीता सहाय्यक (Assistant) उपलब्ध करून देणे.

• आपत्कालीन सेवा: प्राथमिक आरोग्य सुविधा, पोलिस, अग्निशमन हेल्पलाइन, २४×७ आरोग्य विभाग कक्ष आणि आपत्ती संबंधित सर्व यंत्रणांशी संपर्क व समन्वय राखणे.

या विशेष कार्यक्रमास यशवंतराव चव्हाण स्मृती रुग्णालयाचे अधिष्ठाता डॉ. राजेंद्र वाबळे, दिव्यांग भवन फाऊंडेशनचे व्यवस्थापकीय संचालक ओमप्रकाश देशमुख, महानगरपालिकेच्या उप आयुक्त ममता शिंदे, सहाय्यक आयुक्त निवेदिता घार्गे, जनता संपर्क अधिकारी प्रफुल्ल पुराणिक, दिव्यांग भवन फाऊंडेशनचे मुख्य कार्यकारी अधिकारी परेश गांधी यांच्यासह सामाजिक कार्यकर्ते मानव कांबळे, दत्तात्रय भोसले, राजेंद्र वाघचौरे, सोनाली नवांगुळ, डॉ. विना तारकुंडे, डाॅ. वीणा त्रिपाठी, संगीता जोशी, ब्रॅन्ड ॲम्बेसिडर अक्षय सरोदे यांच्यासह शहरातील दिव्यांग बांधव, त्यांचे पालक आणि नागरिक मोठ्या संख्येने उपस्थित होते.

© २०२५ मॅक्स मंथन डेली न्यूज. सर्व हक्क राखीव.