पिंपरी-चिंचवडमध्ये आंतरराष्ट्रीय सायकलिंगचा थरार! ‘बजाज पुणे ग्रँड टूर’साठी जनसागर उसळला; जागतिक दर्जाच्या नियोजनाची शहरावर मोहोर

पिंपरी चिंचवड प्रतिनिधी बालाजी नवले, २४ जानेवारी २०२६ | मॅक्स मंथन डेली न्यूज:

पिंपरी : जागतिक स्तरावरील प्रतिष्ठेची सायकल स्पर्धा ‘बजाज पुणे ग्रँड टूर – २०२६’ चा अंतिम आणि निर्णायक टप्पा आज पिंपरी-चिंचवड शहरातून अत्यंत दिमाखात पार पडला. ९९.१५ किलोमीटरच्या या रोमांचक प्रवासात देश-विदेशातील सायकलपटूंना पाहण्यासाठी शहराच्या प्रमुख रस्त्यांवर नागरिकांनी मोठी गर्दी केली होती. टाळ्यांचा कडकडाट आणि जल्लोषात खेळाडूंचे स्वागत झाल्याने संपूर्ण शहरात जणू क्रीडा उत्सवाचे स्वरूप आले होते.

हा अंतिम टप्पा दुपारी १.३० वाजता म्हाळुंगे-बालेवाडी येथील श्री शिवछत्रपती क्रीडा संकुलातून सुरू झाला. सायकलपटूंनी पिंपरी-चिंचवडमधील राजीव गांधी ब्रिज (औंध), काळेवाडी फाटा, बास्केट ब्रिज (रावेत), डी. वाय. पाटील कॉलेज (आकुर्डी), भक्ती-शक्ती चौक, त्रिवेणीनगर, दुर्गानगर, इंद्रायणी नगर, संत ज्ञानेश्वर क्रीडा संकुल, भोसरी आणि स्पाईन रोड अशा महत्त्वाच्या मार्गांवरून मार्गक्रमण केले. एम्पायर इस्टेट ब्रिजमार्गे ही स्पर्धा दुपारी ४ वाजता पुण्यातील बालगंधर्व रंगमंदिर येथे संपन्न झाली.

आंतरराष्ट्रीय सायकलिंग महासंघाच्या (UCI) कडक निकषांनुसार महापालिका आयुक्त श्रावण हर्डीकर यांच्या मार्गदर्शनाखाली शहरात विशेष तयारी करण्यात आली होती:

• रस्ते दुरुस्ती: मार्गावरील रस्त्यांचे डांबरीकरण, चेंबर्स समपातळीवर आणणे आणि थर्मोप्लास्टिक पेंटिंगमुळे रस्ते चकचकीत झाले होते.

• सौंदर्यीकरण: चौकांचे सुशोभीकरण, बीआरटी रेलिंगची रंगरंगोटी आणि भित्तिचित्रांमुळे शहराचा चेहरामोहरा आंतरराष्ट्रीय दर्जाचा दिसत होता.

• सुरक्षा व्यवस्था: वाहतूक नियोजन, वैद्यकीय सुविधा आणि आपत्कालीन सेवांचे सूक्ष्म नियोजन करण्यात आले होते. काही काळ वाहतूक वळवण्यात आली असली, तरी नागरिकांनी प्रशासनाला मोलाचे सहकार्य केले.

जागतिक स्तरावरील सायकलपटूंना आपल्या शहरात प्रत्यक्ष पाहण्याची संधी मिळाल्याने क्रीडाप्रेमींमध्ये आनंदाचे वातावरण होते. शिस्तबद्ध नियोजन आणि स्वच्छतेमुळे या आंतरराष्ट्रीय स्पर्धेचे यशस्वी आयोजन करण्याची क्षमता पिंपरी-चिंचवड शहराने पुन्हा एकदा जगाला दाखवून दिली आहे. या क्रीडा संस्कृतीच्या संगमामुळे शहराच्या शिरपेचात मानाचा तुरा रोवला गेला आहे.

© २०२६ मॅक्स मंथन डेली न्यूज. सर्व हक्क राखीव.