महापौर रवी लांडगे ॲक्शन मोडमध्ये! पदभार स्वीकारताच पाणी, आरोग्य आणि भटक्या कुत्र्यांचा प्रश्न सोडवण्याचे अधिकाऱ्यांना आदेश

पिंपरी चिंचवड प्रतिनिधी बालाजी नवले, ६ फेब्रुवारी २०२६ | मॅक्स मंथन डेली न्यूज:

पिंपरी-चिंचवड : पिंपरी-चिंचवड महानगरपालिकेच्या नवनियुक्त महापौर, उपमहापौर आणि सत्तारूढ पक्षनेत्यांची निवड जाहीर होताच, पिंपरी-चिंचवड शहर पत्रकार संघाच्या वतीने त्यांचा जंगी सत्कार करण्यात आला. महानगरपालिकेतील पत्रकार कक्षामध्ये पार पडलेल्या या सोहळ्यात महापौरांनी शहराच्या मूलभूत प्रश्नांवर तातडीने काम करण्याचा आपला निर्धार व्यक्त केला.

या विशेष सत्कार प्रसंगी प्रिंट, डिजिटल आणि मुख्य प्रवाहातील माध्यमांचे पत्रकार मोठ्या संख्येने उपस्थित होते.

• नवनियुक्त महापौर रवी लांडगे यांचा सत्कार ज्येष्ठ पत्रकार बापूसाहेब गोरे यांनी केला.

• उपमहापौर शर्मिला बाबर यांचा सत्कार पत्रकार संघाच्या अध्यक्षा सायली कुलकर्णी यांनी केला.

• सत्तारूढ पक्षनेते प्रशांत शितोळे यांचा सत्कार सुनील (बाबू) कांबळे यांनी केला.

यावेळी माजी उपमहापौर राजू मिसाळ, माजी नगरसेवक राजू दुर्गे, राजेश पिल्ले आणि विशेष अधिकारी किरण गायकवाड यांची प्रमुख उपस्थिती होती.

सत्काराला उत्तर देताना महापौर रवी लांडगे म्हणाले की, “एक स्वयंसेवक आज शहराचा महापौर झाला आहे. शहरातील नागरिकांच्या पाण्याचे प्रश्न, आरोग्य सुविधा आणि वाढता भटक्या कुत्र्यांचा त्रास यावर तातडीने उपाययोजना करण्याचे आदेश मी अधिकाऱ्यांना देणार आहे. महापालिकेच्या अधिकाऱ्यांनी नागरिकांना पूर्ण सहकार्य करावे, अशी माझी स्पष्ट भूमिका आहे.”

याच कार्यक्रमाचे औचित्य साधून पिंपरी-चिंचवड शहर पत्रकार संघाच्या अध्यक्षा सायली कुलकर्णी यांचा वाढदिवस नवनियुक्त महापौरांच्या उपस्थितीत केक कापून साजरा करण्यात आला.

या सोहळ्याला ज्येष्ठ पत्रकार बाळासाहेब ढसाळ, नंदकुमार सातुर्डेकर, अमोल काकडे, मिलिंद कांबळे, विकास शिंदे, प्रकाश गायकर, प्रवीण शिर्के, मुकेश जाधव, संतोष जराड, दिलीप देहाडे यांच्यासह शाम सोनवणे, सूरज साळवे आणि शहरातील इतर मान्यवर पत्रकार उपस्थित होते. कार्यक्रमाचे प्रास्ताविक बापूसाहेब गोरे यांनी केले तर आभार सूरज साळवे यांनी मानले.

© २०२६ मॅक्स मंथन डेली न्यूज. सर्व हक्क राखीव.