ताथवडेच्या विकासाचा मार्ग मोकळा होणार! पशुसंवर्धन विभागाची जागा महापालिकेला देण्याबाबत शंकर जगतापांचा मंत्रालयात पाठपुरावा; पंकजा मुंडे यांचा सकारात्मक प्रतिसाद
पिंपरी चिंचवड प्रतिनिधी बालाजी नवले, ११ फेब्रुवारी २०२६ | मॅक्स मंथन डेली न्यूज:
मुंबई/पिंपरी : पिंपरी-चिंचवड शहराच्या पश्चिम भागातील वाहतूक कोंडी फोडण्यासाठी आणि ताथवडे परिसरातील नागरी सुविधांना गती देण्यासाठी चिंचवड विधानसभेचे आमदार शंकर जगताप यांनी आक्रमक पाऊल उचलले आहे. ताथवडे येथील पशुसंवर्धन विभागाची जागा पिंपरी-चिंचवड महानगरपालिकेकडे हस्तांतरित करण्याबाबत त्यांनी राज्याच्या पशुसंवर्धन मंत्री पंकजाताई मुंडे यांची मंत्रालयात भेट घेऊन सविस्तर चर्चा केली.
पिंपरी-चिंचवड महानगरपालिकेच्या मंजूर विकास आराखड्यात (DP) ताथवडे येथील पशुसंवर्धन विभागाची जागा अत्यंत कळीची मानली जात आहे. या जागेच्या हस्तांतरणामुळे खालील महत्त्वाचे प्रकल्प मार्गी लागणार आहेत:
-
४५ मीटर स्पाईन रोड: वाहतूक कोंडी कमी करण्यासाठी महत्त्वाचा दुवा.
-
पवना नदीवरील पूल: सांगवी-किवळे परिसराला जोडणारा प्रस्तावित पूल.
-
नागरी सुविधा: अग्निशमन केंद्र, रुग्णालय, सांडपाणी शुद्धीकरण केंद्र (STP) आणि पाणी पुरवठ्यासाठीची टाकी (ESR).
आमदार शंकर जगताप यांनी यापूर्वी झालेल्या बैठका, अधिकाऱ्यांची संयुक्त पाहणी आणि विभागाची प्राथमिक सहमती यावर पंकजाताई मुंडे यांचे लक्ष वेधले. शहराचा विकास करताना पशुसंवर्धन विभागाच्या कार्यात कोणताही अडथळा येणार नाही आणि विभागाला पर्यायी जागा उपलब्ध करून दिली जाईल, अशी ग्वाही जगताप यांनी दिली. यावर पंकजा मुंडे यांनी सकारात्मक भूमिका घेत, कायदेशीर व प्रशासकीय चौकटीत राहून तातडीने निर्णय घेण्याचे निर्देश संबंधित अधिकाऱ्यांना दिले आहेत.
“पिंपरी-चिंचवड हे वेगाने वाढणारे शहर आहे. शहराच्या दीर्घकालीन गरजा लक्षात घेऊन ही जागा महापालिकेला मिळणे आवश्यक आहे. नागरिकांच्या हिताचे हे प्रश्न शासन दरबारी प्रभावीपणे मांडून ते मार्गी लावण्यासाठी आम्ही कटिबद्ध आहोत,” असे आमदार शंकर जगताप यांनी यावेळी सांगितले. यावेळी पिंपरी-चिंचवड नवनगर विकास प्राधिकरणाचे माजी अध्यक्ष सदाशिवराव खाडे उपस्थित होते.
या जागेच्या हस्तांतरणामुळे ताथवडे, पुनावळे आणि रावेत परिसरातील हजारो नागरिकांना दिलासा मिळणार असून, पायाभूत सुविधांचे जाळे अधिक मजबूत होणार आहे.
© २०२६ मॅक्स मंथन डेली न्यूज. सर्व हक्क राखीव.
