नागरिकांना मोठा दिलासा! मुर्तिजापुरात जन्म-मृत्यू नोंदणीची ६० प्रलंबित प्रकरणे निकाली; आमदार हरिषभाऊ पिंपळे यांचा प्रशासनाला ‘SOP’ तयार करण्याचा आदेश
अकोला /मुर्तिजापुर प्रतिनिधी विलास सावळे, १३ फेब्रुवारी २०२६ | मॅक्स मंथन डेली न्यूज:
मुर्तिजापूर : मुर्तिजापूर शहरातील नागरिकांसाठी अत्यंत महत्त्वाचा असलेला जन्म-मृत्यू नोंदणीचा प्रश्न आता मार्गी लागला आहे. तांत्रिक कारणांमुळे गेल्या अनेक दिवसांपासून प्रलंबित असलेली ६० प्रकरणे आमदार हरिषभाऊ मारोतीआप्पा पिंपळे यांच्या पुढाकाराने तातडीने निकाली काढण्यात आली आहेत. या निर्णयामुळे शासकीय कामांसाठी दाखल्यांच्या प्रतीक्षेत असलेल्या अनेक कुटुंबांना मोठा दिलासा मिळाला आहे.
शहरातील अनेक नागरिकांच्या जन्म आणि मृत्यूच्या नोंदी तांत्रिक त्रुटींमुळे रखडल्या होत्या, ज्याचा परिणाम वारसा हक्क, शिक्षण आणि इतर शासकीय योजनांच्या लाभावर होत होता. हा प्रश्न गांभीर्याने घेत आमदार पिंपळे यांनी आज तातडीची बैठक बोलावली होती. बैठकीत ६० प्रकरणांची कागदपत्रे पडताळून ती तात्काळ निकाली काढण्याचे स्पष्ट निर्देश संबंधित विभागाला देण्यात आले.
केवळ प्रलंबित प्रकरणे निकाली न काढता, भविष्यात नागरिकांना वारंवार कार्यालयाचे उंबरठे झिजवावे लागू नयेत, यासाठी आमदार पिंपळे यांनी प्रशासनाला नवीन SOP (Standard Operating Procedure) तयार करण्याचे आदेश दिले आहेत. यामुळे नोंदणी प्रक्रियेत सुसूत्रता येईल आणि कामकाज अधिक गतिमान व पारदर्शक होणार आहे.
या महत्त्वपूर्ण बैठकीला नवनिर्वाचित नगराध्यक्ष हर्षल रामेश्वर साबळे, उपनगराध्यक्ष रोहित अव्वलवार, नगरसेवक राम जोशी, उपविभागीय अधिकारी (SDO), नायब तहसीलदार, नगरपरिषदेचे मुख्याधिकारी (CO) आणि जन्म-मृत्यू नोंदणी विभागाचे कर्मचारी उपस्थित होते.
प्रशासनाच्या या जलद कार्यवाहीमुळे मुर्तिजापूर शहरातील नागरिकांनी समाधान व्यक्त केले असून, प्रलंबित दाखल्यांचा प्रश्न आता कायमचा सुटण्याची चिन्हे दिसत आहेत.
© २०२६ मॅक्स मंथन डेली न्यूज. सर्व हक्क राखीव.
