उर्ध्व वर्धा प्रकल्पाचे पाणी आरक्षणाचे नियोजन निश्चित! जिल्हाधिकारी आशिष येरेकर यांनी दिली पाणी आरक्षणास मंजुरी; ८९.४११ दलघमी पाणी बिगर सिंचनासाठी राखीव

अमरावती, १४ फेब्रुवारी २०२६ | मॅक्स मंथन डेली न्यूज:

अमरावती : जिल्हाधिकारी आशिष येरेकर यांच्या अध्यक्षतेखाली नियोजन भवन येथे उर्ध्व वर्धा प्रकल्पाच्या कालवा सल्लागार समितीची महत्त्वपूर्ण बैठक पार पडली. या बैठकीत सन २०२५-२६ या वर्षासाठी सिंचन आणि बिगर सिंचन पाणी आरक्षणाचे नियोजन करण्यात आले असून, रखडलेली पाणीपट्टी थकबाकी मार्च २०२६ पूर्वी वसूल करण्याचे कडक निर्देश जिल्हाधिकाऱ्यांनी दिले आहेत.

उर्ध्व वर्धा प्रकल्पाचे लाभक्षेत्र अमरावती आणि वर्धा या दोन्ही जिल्ह्यांत पसरलेले आहे. या बैठकीत सिंचनाबाबत खालील माहिती देण्यात आली:

• सिंचन क्षेत्र: चालू रब्बी हंगामासाठी एकूण ३१ हजार हेक्टर क्षेत्राचे नियोजन करण्यात आले आहे.

• पाणी आवर्तने: आतापर्यंत ३ पाणी पाळ्यांची आवर्तने पूर्ण झाली असून, त्यातून १० हजार हेक्टर क्षेत्रावर सिंचन झाले आहे.

• आगामी नियोजन: उर्वरित २ आवर्तने मार्च २०२६ पर्यंत पूर्ण केली जातील. उन्हाळी पिकांच्या क्षेत्रात वाढ करण्यासाठी कृषी आणि जलसंपदा विभागाने समन्वयाने काम करावे, अशा सूचना जिल्हाधिकाऱ्यांनी दिल्या.

असे असेल पाणी आरक्षण (सन २०२५-२६)

बिगर सिंचन पाणीपुरवठा योजनांची थकबाकी मोठ्या प्रमाणावर असल्याचे या बैठकीत निदर्शनास आले. मार्च २०२६ पूर्वी ही सर्व थकबाकी वसूल करण्याचे आदेश संबंधित यंत्रणांना देण्यात आले आहेत. या बैठकीला विधानपरिषद सदस्य दादारावजी केचे हे दूरदृश्य प्रणालीद्वारे उपस्थित होते. त्यांनी सर्व लाभधारकांना विहित वेळेत पाणी पोहोचवण्याबाबत प्रशासनाला निर्देशित केले.

या बैठकीस अधीक्षक अभियंता मनीष राजभोज, कार्यकारी अभियंता अनिकेत सावंत, जिल्हा कृषी अधिकारी राहुल सातपुते, महाबीजचे जिल्हा व्यवस्थापक एस. पी. देशमुख यांच्यासह उर्ध्व वर्धा सिंचन मंडळाचे सर्व उपविभागीय अभियंता उपस्थित होते.

© २०२६ मॅक्स मंथन डेली न्यूज. सर्व हक्क राखीव.