अवैध नळ कनेक्शन असणाऱ्यांवर आता नगर परिषदेचा ‘वॉच’! ३१ मार्चपर्यंत नियमित न केल्यास ५००० रुपये दंड आणि कायदेशीर कारवाई

अकोला /मुर्तिजापुर प्रतिनिधी विलास सावळे, २७ फेब्रुवारी २०२६ | मॅक्स मंथन डेली न्यूज:

मुर्तिजापूर : शहरातील अवैध नळ कनेक्शनमुळे नगर परिषदेचे होणारे आर्थिक नुकसान आणि पाणी पुरवठ्यावर होणारा ताण लक्षात घेता, नगर परिषद प्रशासनाने आता आक्रमक पाऊल उचलले आहे. शहरातील सर्व अवैध नळ जोडण्या शोधण्यासाठी विशेष सर्वेक्षण मोहीम राबविण्याचा निर्णय घेण्यात आला असून, अशा नागरिकांना आपले नळ कनेक्शन अधिकृत करण्यासाठी ३१ मार्च २०२६ पर्यंतची अंतिम मुदत देण्यात आली आहे.

नगर परिषदेच्या सर्वसाधारण सभेत या संदर्भातील महत्त्वपूर्ण ठराव सर्वानुमते मंजूर करण्यात आला असून, मुख्याधिकाऱ्यांना या मोहिमेच्या अंमलबजावणीसाठी विशेष अधिकार देण्यात आले आहेत.

३१ मार्चनंतर ज्या घरांमध्ये अवैध नळ जोडणी आढळून येईल, त्यांच्यावर खालीलप्रमाणे कारवाई केली जाणार आहे:

• थकीत पाणीपट्टीची वसुली: नळ जोडणी झाल्याच्या कालावधीपासून आजपर्यंतची सर्व थकीत पाणीपट्टी वसूल केली जाईल.

• दंडात्मक शुल्क: नियमित कनेक्शन शुल्काव्यतिरिक्त ५,००० रुपये (अक्षरी पाच हजार रुपये) अतिरिक्त दंड आकारला जाईल.

• जोडणी खंडित करणार: थकीत रक्कम आणि दंड न भरल्यास संबंधित अवैध नळ जोडणी तात्काळ तोडण्यात येईल.

• कायदेशीर कारवाई: संबंधित धारकाविरुद्ध प्रचलित नियमांनुसार प्रशासकीय आणि फौजदारी कारवाई करण्यात येईल, ज्याचा सर्व खर्च संबंधितांकडूनच वसूल केला जाईल.

“शहरातील पाणी पुरवठा व्यवस्था सुरळीत ठेवण्यासाठी आणि कायदेशीर पेच टाळण्यासाठी नागरिकांनी स्वत:हून पुढे येऊन आपली नळ जोडणी नियमित करून घ्यावी. ३१ मार्चनंतर कोणतीही सबब ऐकून घेतली जाणार नाही,” असे आवाहन नगर परिषदेच्या वतीने करण्यात आले आहे.

नगर परिषदेने राबविलेल्या या विशेष मोहिमेमुळे शहरातील अधिकृत नळ धारकांना दिलासा मिळणार असून, अनधिकृत पाणी वापराला लगाम बसण्याची शक्यता आहे.

© २०२६ मॅक्स मंथन डेली न्यूज. सर्व हक्क राखीव.