जागतिक सिनेमाचा महाकुंभ! ‘क्रांतिज्योती विद्यालय-मराठी माध्यम’ चित्रपटाच्या प्रीमियरने होणार महोत्सवाचा समारोप; दिग्दर्शक रोहन कानवडे यांना ‘सिने आयकॉन’ पुरस्काराने गौरवणार

पिंपरी प्रतिनिधी आकाश कांबळे, ०४ मार्च २०२६ | मॅक्स मंथन डेली न्यूज:

पिंपरी : पिंपरी-चिंचवड महानगरपालिकेच्या सहकार्याने आयोजित ‘पिंपरी-चिंचवड आंतरराष्ट्रीय चित्रपट महोत्सव २०२६’ चा समारोप उद्या, ०५ मार्च २०२६ रोजी अत्यंत दिमाखदार सोहळ्यात पार पडणार आहे. या सोहळ्याचे मुख्य आकर्षण म्हणजे दुपारी ३ वाजता होणारा ‘क्रांतिज्योती विद्यालय-मराठी माध्यम’ या चित्रपटाचा विशेष प्रीमियर. त्यानंतर सायंकाळी ६:३० वाजता दिग्गज राजकीय नेते आणि सिनेसृष्टीतील मान्यवरांच्या उपस्थितीत पारितोषिक वितरण समारंभ संपन्न होईल.

महापौर रवि लांडगे यांच्या हस्ते विजेत्यांना गौरविण्यात येणार असून, आकुर्डी येथील ग. दि. माडगूळकर नाट्यगृहात होणाऱ्या या कार्यक्रमाला नागरिकांनी मोठ्या संख्येने उपस्थित राहावे, असे आवाहन करण्यात आले आहे.

समारोप सोहळ्याला केंद्रीय राज्यमंत्री मुरलीधर मोहोळ आणि उपमुख्यमंत्री तथा पालकमंत्री सुनेत्राताई पवार यांची विशेष उपस्थिती लाभणार आहे. तसेच:

• प्रमुख उपस्थिती: उच्च व तंत्रशिक्षण मंत्री चंद्रकांत पाटील, कृषी मंत्री दत्तात्रय भरणे, विधान परिषद उपसभापती नीलम गोऱ्हे, विधानसभा उपाध्यक्ष अण्णा बनसोडे, नगरविकास राज्यमंत्री माधुरी मिसाळ.

• खासदार-आमदार: खासदार मेधा कुलकर्णी, सुप्रिया सुळे, श्रीरंग आप्पा बारणे, डॉ. अमोल कोल्हे. आमदार उमा खापरे, अमित गोरखे, महेश लांडगे, शंकर जगताप, शंकर मांडेकर.

• मनपा पदाधिकारी: उपमहापौर शर्मिला बाबर, पक्षनेते प्रशांत शितोळे, विरोधी पक्षनेते भाऊसाहेब भोईर, स्थायी समिती सभापती अभिषेक बारणे आणि पाचही विषय समित्यांचे नवनियुक्त सभापती.

आंतरराष्ट्रीय स्तरावर गाजलेल्या ‘साबर बोंडं’ या चित्रपटाचे दिग्दर्शक रोहन कानवडे यांना यंदाचा ‘पीसीआयएफएफ युवा प्रेरणादायी सिने आयकॉन पुरस्कार २०२६’ देऊन सन्मानित करण्यात येणार आहे. याशिवाय महोत्सवातील सर्वोत्कृष्ट फीचर फिल्म, माहितीपट, लघुपट आणि ६० सेकंदांच्या लघुपटांनाही मान्यवरांच्या हस्ते पारितोषिके दिली जातील.

उद्या दुपारी ३ वाजता होणारा ‘क्रांतिज्योती विद्यालय-मराठी माध्यम’ हा चित्रपट मराठी भाषेतील शिक्षणाचे महत्त्व अधोरेखित करणारा आहे. या प्रीमियरला आयुक्त श्रावण हर्डीकर, अतिरिक्त आयुक्त विजयकुमार खोराटे, तृप्ती सांडभोर, विक्रांत बगाडे आणि पिंपरी चिंचवड फिल्म सोसायटीचे पदाधिकारी उपस्थित राहणार आहेत.

महोत्सवाचा हा शेवटचा दिवस चित्रपट रसिकांसाठी पर्वणी ठरणार असून, दुपारी १ वाजता ‘फिल्म इन्स्टिट्यूट ऑफ इंडिया’च्या वतीने विशेष चर्चासत्राचेही आयोजन करण्यात आले आहे.

© २०२६ मॅक्स मंथन डेली न्यूज. सर्व हक्क राखीव.