विशेष शोध अहवाल: जनतेच्या घामाचा पैसा ‘खुर्ची’खाली दडपला! महापालिकेची १ कोटींची ‘शाही’ उधळपट्टी; रस्ते-पाण्याला निधी नाही, पण साहेबांच्या पाहुण्यांना ८ हजारांची खुर्ची!

पिंपरी प्रतिनिधी आकाश कांबळे, १८ मार्च २०२६ | मॅक्स मंथन एक्सक्लुझिव्ह:

पिंपरी : “तिजोरीत खडखडाट, तरीही खुर्च्यांचा थाट!” अशी काहीशी अवस्था सध्या पिंपरी-चिंचवड महानगरपालिकेची झाली आहे. शहरातील रस्ते खड्ड्यात गेले आहेत, अनेक सोसायट्यांत पाणी टंचाईचे चटके बसत आहेत आणि आरोग्य सुविधांसाठी निधी नसल्याचे रडगाणे गाणाऱ्या प्रशासनाने चक्क १ कोटी रुपये केवळ ‘व्हिजिटर खुर्च्या’ खरेदी करण्यासाठी उधळण्याचा घाट घातला आहे. सामान्य करदात्या नागरिकांच्या पैशांची ही क्रूर थट्टा असल्याची भावना शहरात उमटत आहे.

महानगरपालिकेच्या मध्यवर्ती भांडार विभागाने शहराच्या विविध कार्यालयांसाठी १,१२७ व्हिजिटर खुर्च्या खरेदी करण्याची निविदा प्रक्रिया पूर्ण केली आहे. या निविदेतील आकडेवारी चक्रावून टाकणारी आहे:

• एका खुर्चीची किंमत: ₹८,५२५ (साध्या व्हिजिटर खुर्चीसाठी हा दर अवाढव्य मानला जात आहे).

• एकूण खर्च: सुमारे ₹९६ लाख १५ हजार (१ कोटींच्या घरात).

• ठेकेदार: सांगवी येथील एका ठराविक कंपनीला हे काम देण्यात आले आहे.

• नवाजुनी: विशेष म्हणजे ही निविदा अंदाजपत्रकीय दरापेक्षा केवळ ०.२९% कमी दराने मंजूर झाली आहे, ज्यामुळे निविदा प्रक्रियेतील पारदर्शकतेवर संशय व्यक्त होत आहे.

महापालिका वारंवार सांगते की आर्थिक मंदीमुळे अनेक विकासकामांना कात्री लावली आहे. मग प्रश्न असा पडतो की:

१. शहरात पिण्याच्या पाण्याचे टँकर सुरू असताना १ कोटींच्या खुर्च्यांची तातडीची गरज काय?

२. जुन्या खुर्च्यांची किरकोळ दुरुस्ती करून वापर करणे शक्य असताना नवीन खरेदीचा अट्टाहास का?

३. आरोग्य केंद्रांत औषधे उपलब्ध नसताना ‘व्हिजिटर्स’च्या आरामासाठी ही उधळपट्टी कोणाच्या सांगण्यावरून सुरू आहे?

सर्वात संतापजनक बाब म्हणजे, प्रशासनाच्या या उधळपट्टीवर आवाज उठवणारे लोकप्रतिनिधी आणि नवनिर्वाचित नगरसेवक चक्क मौन बाळगून आहेत. “जनतेच्या कामासाठी निधी नाही” असे सांगणारे नगरसेवक स्वतःच्या दालनातील चकाचक खुर्च्यांच्या खरेदीवर मात्र गप्प आहेत. ही ‘प्रशासकीय आणि राजकीय’ मिलीभगत शहराच्या विकासाला कीड लावत असल्याची चर्चा नाक्यानाक्यावर सुरू आहे.

नवनियुक्त आयुक्त डॉ. विजय सूर्यवंशी यांनी कालच कार्यालयीन शिस्तीचा आढावा घेतला. आता या ‘कोटींच्या उधळपट्टी’च्या फाईलवर ते स्वाक्षरी करतात की ही उधळपट्टी रोखून तो निधी जनहिताच्या कामांकडे वळवतात, याकडे संपूर्ण शहराचे लक्ष लागले आहे.

© २०२६ मॅक्स मंथन डेली न्यूज. सर्व हक्क राखीव।